كنا اتكلمنا قبل كدا عن مهارات التواصل الاجتماعي و ازاي اكون شاطر في العلاقات بتاعتي مع الناس
و قولنا ( كمراجعه سريعه لأي حد مكانش قرأ البوست اللي فات ) ان التواصل الاجتماعي ما بين الناس محتاج شكل كويس عشان تكون علاقاتنا بالناس حولينا كويسه و مريحه في نفس الوقت
و كنا قولنا ان في شوية صفات للتواصل الناجح دا و هي:
1- الاستماع الجيد ( Good Listening )
2- الوضوح ( Clarity )
3- الوِد فالتعامل ( Friendliness )
4- الثقه (Confidence )
5- الاحترام ( Respect )
6- العقل المتفتح ( Open Minded )
و هنتكلم المره دي عن الصفه الاولانيه : الاستماع الجيد ( Good Listening)
السمع كحاسه هو حاجه تلقائيه بنعملها منغير ما نبذل اي مجهود , يعني مش بنحتاج نتعب نفسنا في حاجه و احنا بنسمع الاصوات من حولينا .
بس للاسف السمع كمجرد حاسه شغاله من تلقاء نفسها عمره ما كان مفيد فالتواصل ما بين البشر , دا فايدته انك تاخد بالك من عربيه جايه عليك فجأه فتسمع الكلاكس و تبعد , او مثلا حد بينده عليك فتبصله , و دا بيكون دور السمع كحاسه مش اكتر
بس من اول ما هبدأ ارد عالشخص اللي ندهني و هبدأ اتكلم معاه و هيبدأ بيني و بينه حوار , تبدأ معاه انواع السمع ال 5 و الانواع دي هي اللي بتحدد اهتمامك بالموضوع عامل ازاي
الانواع ال 5 بتتقسم كالآتي :-
1- التجاهلي ( Ignoring Listening )
2- التظاهري ( Pretending Listening)
3- الانتقائي ( Selective Listening)
4- الانتباهي ( Active Listening )
5- التفاعلي ( Pro-Active Listening )
الانواع دي هي اللي بتحدد انت بتسمع اللي قدامك لاي درجه , في حد هيكون بيتجاهل الشخص اللي بيكلمه , حد تاني بيكون بيتظاهر انه بيسمعك بس هو مش معاك اصلا , نوع تاني من الناس بيكون مش مركز معاك اوي , هو سامعك بس بينتقي اللي بيسمعه , يعني مش بيكون مركز معاك بنسبة 100% , في شخص تاني بيكون سامعك و مركز معاك و بيكون فعلا مستمع جيد , بس مش متفاعل معاك , النوع الاخير هو التفاعلي , و دا شخص بيكون سامعك كويس جدا جدا و مركز معاك و كمان متفاعل معاك و بيحاول يناقشك و يساعدك لو عندك مشكله , و دا بيكون افضل نوع .
طب و بعد ما عرفنا انواع المستمعين ( Listeners) المطلوب اعمل ايه عشان احسن من علاقتي بالناس عن طريق ال Listening
في شوية حاجات لازم نعملها عشان نحسن من مهارات السمع بتاعتنا
1- لازم نركز مع الشخص اللي بيتكلم و يكون تركيزنا عالكلام مش عالمتكلم
2- خد بالك من تعبيرات وش الشخص اللي بيكلمك , تعبيرات الوش دايما بتبين هو حاسس ب ايه و دا هيساعدك تتفاعل معاه احسن
3- اسأل , لو في حاجه مفهمتهاش اسأل عشان تفهمها , كل ما تفهم الكلام اوضح كل ما هتتواصل بشكل افضل
4- متقاطعش , سيب اللي بيتكلم يخلص كلامه لان المقاطعه هتخليك متفهمش الموضوع بشكل صح
5- خليك هادي , لو انت حد مش هادي مش هتكون مريح و حد بيكلمك
6- ركز عينك مع المتكلم , عشان يحس انك معاه مش سرحان
و بكده انت قدرت تسمع كويس و دا هيخليك تفهم الناس كويس و بقى عندك قدره انك تتواصل كويس
دا بيبين انك فاهم اللي قدامك , بيبني علاقات قويه مع الناس , بيسيب رصيد كويس عن الناس اللي بتكون مرتاحه و هي بتتكلم معاك , بتبين انك مهتم
اخيراً هقولك ان كل ما تسمع اكتر ما تتكلم , كل ما بتكون شخص علاقتك اقوى بالناس لانك بتفهمهم كويس
لو عايز تقرأ بوست مهارات التواصل الاجتماعي هتلاقيه هنا : https://waslatrainingteam.wixsite.com/home/blog-1/ho-to-communicate-well-with-others?fbclid=IwAR090BQzJSOwktsmx5mKxzRvzPa-rYwr0JGTNlrFkiZL0g-C7GgTyQmYStI
و لو عايز تتابعنا هتلاقي الفيسبوك هنا : https://www.facebook.com/helmy.hanna.984
و هتلاقي Linkedin هنا : https://www.linkedin.com/in/helmy-edward-609102116/