زي كل مره هنراجع علي اللي قولناه المره اللي فاتت :-
كنا بدأنا الحكايه بشويه كلام مبسط عن العلاقات بين الناس , و العلاقات دي كان لازم يكون في طريقه لتقويتها و سميناها التواصل الاجتماعي , و التواصل دا محتاج شكل معين عشان تكون العلاقات دي خفيفه و مريحه بين الناس , و هتلاقي البوست دا هنا : https://waslatrainingteam.wixsite.com/home/blog-1/ho-to-communicate-well-with-others
و بعد كدا اتكلمنا عن حاجه مهمه من مهارات التواصل الاجتماعي اسمها مهارات الاستماع الجيد , و في المره دي قولنا عشان اقدر اتواصل مع الناس كويس كان لازم اسمع كويس و قولنا ازاي نسمع الناس كويس عشان افهمهم كويس . و هتلاقي الكلام دا هنا : https://waslatrainingteam.wixsite.com/home/blog-1/good-listening-skills
و المره اللي بعدها اتكلمنا عن الردود و فن الردود عشان اكيد بعد ما سمعت كويس هحتاج ارد بشكل لبق و مؤدب و كان كلامنا عن ازاي احسن من ردودي و ايه الطريقه المناسبه اللي اتكلم بيها مع كل شخص . و هتلاقي شرح الردود فالبوست دا : https://waslatrainingteam.wixsite.com/home/blog-1/talk-well-communicate-well
و المره دي هنتكلم عن حاجه مهمه جداً و كبيره جداً اسمها الشخصيات ( Personality Styles ) اكيد طبعا مهم جداً عشان اعرف اتعامل مع الناس في المجتمع سواء اهلي فالبيت , صحابي , زمايلي فالجامعه , دكتور الجامعه او مديري فالشغل , لازم اعرف انواع الشخصيات بتاعتهم ايه , طباعهم ايه , الناس دي بتفضل انهي اسلوب فالمعامله , بتحب انهي طريقه و انت بتتكلم معاها , كل دي حاجات مهمه لازم اراعيها فالكلام مع اي شخص فالدنيا
يعني لو انا هتعامل مع حد من صحابي مثلا مش بيحب الهزار الكتير و طول ما انا قاعد بهزر و بضحك و بألش , هو اكيد مش هيحب دا و مش هيتقبل القعاد معايا كتير , بالعكس .. الشخص دا هيزهق مني و هيحاول يقلل علاقته بيا .
و عشان نعرف نتعامل مع كل الناس , كل شخص علي حسب طباعه , لازم اعرف طباع الشخصيات دي ايه و ايه انواعها الاول .
الاول لازم نتكلم يعني ايه شخصيه ....
الشخصيه هي مجموعة صفات نفسيه و جسديه ,, في منها الموروث و في منها مكتسب نتيجة مواقف عشتها و اثرت فيا سواء بشكل كلي او بشكل جزئي في بعض طباعي , الشخصيه بردو بتتـثر بالعادات و التقاليد اللي عشت فيها و اتربيت عليها
الشخصيات عموماً ليها 4 انواع اساسيه , الانواع دي عرفها و حددها د. ويليام مارستون ( Dr. William Marston )
د. ويليام لما اتكلم عن الشخصيات دي في منهج كامل لدراسة الشخصيات اسمه DISC
اتكلم عن ان كل الناس بتتشارك في اربع انواع او طباع اساسيه في كل الناس , بس كل واحد فيه من الانواع دي بنسب عشان يطلع شخصيه مميزه لكل فرد فينا
الانواع الاربعه هي D , I , S , C
1- اول نوع هو D اختصار ل Dominance و دا شخص بيميل انه يبقى مسيطر عالوضع بالكامل , بيحب جدا ياخد قراراته بنفسه , بيحب يكون متبوع مش تابع , من اقوى العلامات اللي فيه انه بيحب يكون القرارت طالعه منه هو في اي موقف , سواء بقى لو شلة صحاب بيتفقوا علي مشوار فيقرر هو المكان اللي هيروحوه , او اقتراح فالشغل فيقول رايه و يمسك فيه جداً . و هكذا , كمان بيحب يعمل كذا حاجه في نفس الوقت و دا بيسبب تشتت كبير و بيخليه ميقدرش يطلع نتايج قويه في كل حاجه و اخيراً هو شخص يكره الروتين و التكرار .
2- النوع التاني I هو اختصار ل Influential و دا بقي شخص مؤثر جدا في اللي حوليه , مندفع , رغاي جدا و بيحب يتكلم كتير , متعاطف مع كل الناس , سريع الثقه فالناس , مقنع و متفائل الشخص دا بيقدر يشتغل و يعمل بقوه في المجتمعات المليانه بناس حوليه دايما مبدع في افكاره و بيقدر يفكر كويس و يجيب افكار من برا الصندوق , طبيعته ابداعيه و افكاره غير متوقعه , شخص بيميل للسلام جدا , مبيحبش النواعات او الصراعات علي اي حاجه بس فالمقابل هو حد مش بيهتم بالتفاصيل , بيهتم جدا بالناس اللي معاه و نفسيتهم و دا بالنسباله اهم من النتايج او اهم من المؤسسه اللي هو شغال فيها , المهم الناس تكون بخير , بس هو مش مستمع جيد , هيتظاهر انه معاك و مركز بس هو في وادي تاني خالص.
3- تالت نوع S هو اختصار ل Steady و دا شخص هادي جداً , ثابت و مستقر , بيحب جداً الالتزام بالروتين و بالنمط اللي هو عامله لنفسه , تقدر تتوقع تصرفاته بسبب الروتين دا , شخص ودود جداً و بيحب يبقي محبوب , مستمع جيد جداً و دايما بتحسه حكيم نتيجة هدوئه و نصايحه ليك , تقدر تعتمد عليه في حاجات كتير و بيقدر يعمل كذا حاجه في نفس الوقت , بس هو مبيحبش التغيير , التغيير بالنسباله صعب و يمكن مستحيل , و لو حصل تغيير غصب عنه بيبقي صعب عيه و بياخد وقت طويل عشان يتأقلم مع التغيير دا , حساس جداً .
4- أخيراً C و دا اختصار ل Cautious و دا شخص متحفظ جداً , بتشوفه دايمه مرتب و منظم , دولابه مترتب جداً , مكتبه مرصوص , شخص مهندم جداً , كمان هو دقيق و مهووس بالتفاصيل و دا في اوقات كتير بيسبب انه بيركز مع تفاصيل صغيره كان ممكن يتجاهلها بس بينشغل عن نقط كبيره و خطوات مهمه كان لازم ياخدها , هو كمان شخص محلل لكل التفاصيل و الاحداث و بيقدر يربط الاحداث ببعض ببراعه , تركيزه عالي و بيعرف يحل المشاكل بشكل كويس , مطور للافكار بسبب تركيزه و تحليله ليها , بيقدر يعمل من الافكار اللي بتطرح عليه افكار تانيه ممتازه , بس مبيقدرش يبتكر فكره او حل , هو بس بيطورها , الشخص دا بيحتاج لحدود واضحه بينه و بين الناس , مش بيحب الاختلاط بالناس كتير , و لازم يسيب حوليه دايره محدش يتخطاها , بيحب يلتزم بالنظام اللي هو سابه لنفسه و مبيحبش يبعد عنه , مبيحبش الانتقاد .
زي ما د. ويليام قال : كلنا جوانا الاربع انواع بس بنسب , يعني ممكن اكون شخص S بنسبه كبيره بس جوايا طباع من الشخصيه ال I و D و C و النسب متغيره من شخص للتاني و دا بيسيب تفاوت في شخصياتنا , مش كلنا شبه بعض
اخيراً احب اقولك ان دلوقتي بعد ما عرفت ايه هي انواع الشخصيات و ايه هي طباعهم و صفاتهم , ابدأ فكر في كل القريبين اللي فحياتك و اعرف كل واحد بيميل لانهي نوع اكتر , و حاول تعامله المعامله اللي تناسبه اكتر , و اكيد هتحتاج تعرف نوع شخصيتك ايه
اتمنى يكون البوست دا مفيد ليك و للناس اللي حوليك , لو استفدت من البوست دا متنساش تعمل Like و Share و منشن صحابك هنا و قولهم هما انهي شخصيه فيهم
و لو عايز تتابعنا هتلاقي الفيسبوك هنا : https://www.facebook.com/helmy.hanna.984
و هتلاقي Linkedin هنا : https://www.linkedin.com/in/helmy-edward-609102116/